laki-laki deng hahalang

Karya : Esaf Malioy

Laki-laki dengar ayam bakuku tiga kali,

takajo bangong, dudu dipinggir tapalang 

deng mata masi mamboro, 

kuca-kuca akang,lalu basuh deng air 

par kasi ilang manganto sisa

Laki-laki bajalang ka muka tungku,

kumpul api, taru aer panas,

lome sagu manta lalu tuang papeda,

bakar ikang, giling ulak sadiki

rau daong pisang, lalu bungkus bakal

Laki-laki loko parang, lenggang satu napas,

potong jalang, lena bantu pintu

sampe di kabong biking wango-wango par user agas

pameri kiri kanang, biking kuming baru, isi  kasbi deng kaladi,

cabu taki deng parampuang malu, lalu tambong akang par pupuk

Laki-laki talang aer  par bunu aos, isi poro,

ambel snang sadiki, cabu kasbi,kaladi, pete daong kasbi,

matel,paku-paku saji, punggul cili

lahia kalapa karing, letu akang pung jaga par biking kamboti

Matahari amper tapele di balakang gunung,

Laki-laki pasapua isi kasbi,kaladi, daong kasbi,matel,

paku-paku saji, cili, dalang kamboti,

potong gopasa par biking hahalang,lalu taru akang di  bahu,

ator langkah satu napas, lena kapala aer, 

paparipi sampe di rumah

jang sampe bakudapa galap di tengah jalang

 Mar sakarang................

laki-laki deng hahalang tu su seng ada lai

antua su pigi ka tampa

yang antua rindu akang dari kacil

Sebelum pigi, antua cuma bilang

Biar  beta su seng ada lai !

mar dong pung hidop ade kaka tetap baku sayang

satu susa, samua rasa susa

satu sanang, samua rasa sanang

Ambon, 17 Nopember 2011